فن
أخر الأخبار
ليلي عز العرب لإخباري : انا مصرية حتي النخاع و هدي بالإختيار اقل حاجه تقدم لأبطال الوطن
حوار : ولاء عرابي
“ليلي عز العرب” فنانة مصرية تغلب عليها حب الفن حتي أخذها من مجال عملها الاول الاقتصاد والبنوك ، يعود حبها للفن كونها حفيدة “الشيخ أبو العلا محمد” مكتشف كوكب الشرق السيدة ” أم كلثوم “.
ظهرت في فيلم “إسكندرية نيويورك” وقدمها فيه “المخرج العالمي يوسف شاهين ” بدور صغير للغاية في الفيلم ثم قدمت دورا مهما مع النجم “أحمد ذكي” في معالي الوزير ومع “النجم هاني رمزي” في فيلم “عايز حقي ” ومسلسل الاصدقاء وفارس الرومانسية إلي ان ظهرت فعليا بدور رئيسي في فيلم 1000 مبروك بدور الام مع النجم أحمد حلمي
الفنانة الجميلة و المتألقة ” ليلي عز العرب ” اهلا بيكي في صفحات “بوابة إخباري” وبين جمهورك الذي يحب فنك و يعشقك أهلا بيكي نجمتنا الجميلة ” ليلي عز العرب ”
- كبداية لحوارنا الناس كلها عارفة الفنانة “ليلي عز العرب ” بـ “سامانثا ” أم أحمد مكي في “الكبير أوي” انت بتحبي الناس تعرفك باسم ليلي ولا بتحبي الناس تعرفك بالشخصيات الجميلة الي ظهرتي بيها في اعمالك زي سامانثا أو شخصية تانية بتحبيها واقرب الي قلبك ؟
- طبعا باعتز جدا بكل الشخصيات اللي عملتها بس طول عمري احب الناس تعرفني باسمي و باعتز جدا بكدا وبأعتقد لما الناس تناديني بسامانثا او حتي بأني والدة أحمد حلمي في الف مبروك .
- نقدر نعرف بدايتك بالضبط في أي عمل ومين أكتر حد ممكن يكون له الفضل في دخولك العالم الفني ؟
- بدايتي كنت باعتبرها كلها فترة اختبارات لنفسي اتاكد منها اني اعرف امثل فعلا ولا لاء بس انا اعتمدت اكتر علي دراعي يعني محدش قدمني للوسط الفني لكن احقاق لحق ممكن اقول ان في ا حاتم كان انتاج في فيلم الف مبروك واحد من اللي كانو مصرين اني اعمل الدور وكان مصمم اني اقدم الدور دا جداً.
أحبك الجميع منذ ظهورك الأول في فيلم الف مبروك فلماذا جاءت خطوة التمثيل متأخرة ؟
- انا كان عندي شغل محترم وكويس اوي وكان صعب إني اضحي بيه وحياتي خدتني من هوايتي التمثيل لكن الموضوع جه في الوقت اللي ربنا كتبه .
- ايه أكتر عمل شايفة انه وصل للجمهور ومعلق معاهم ؟
– من غير اي تردد طبعا دوري في الكبير أوي وبعديه علي طول 1000 مبروك و الباقي اعتز بيهم طبعا ً.
- هدي في مسلسل الاختيار كان دور مميزة جدا حدثينا عنه وعن رأيك في الدراما الوطنية في هذه الفترة ؟
- هدي بمسلسل الإختيار دور انا باعتز بيه جدا و شرف لي ووسام علي صدري و اجمل حاجه كانت تعليقات ظباط قالو انهم حسوا فعلا اني امهم ودي أقل حاجه ممكن الواحد يقدمهالهم , ورايي في الاعمال الوطنية زي الاختيار ان الدراما بتوصل للجمهور الحاجة اللي ممكن ميكونش يعرفها و بتزود الوعي عن المتلقي .
- ايه أخر اعمال ليلي عز العرب ؟
- اخر اعمالي هتتعرض بعد رمضان وهما مسلسلين واحد اسمه “بين السطور” و مسلسل في “وش الريح” وفي فيلمين هما “اتنين للايجار ” و “جروب الماميز “
- وهل في اعمال في رمضان بعد الكبير أوي ؟
- هيتعرض لي ان شاء الله مسلسل كشف مستعجل وهو كوميدي علي واتش ات وهو انتاج خاص لمنصة واتش ات في رمضان .
- هنشوفك في السينما والمسرح قريب ولا مركز في الدراما فقط والمسلسلات ؟
- المسرح ابو الفنون وانا عملت تجربتين فيه و كمان السينما هي تاريخ الفنان و الدراما سهلة الوصول للجمهور فلا اعتقد ان في فنان هيرفض عمل في اي حاجه من الثلاثه طالما الدور مميز .
- أدورك جميعها رائعة ومؤثرة جدا في اي عمل فهل لك معايير خاصة في قبول الأدوار ؟
- طبعا لي معايير خاصه وهي اولاً الورق وثانيا المخرج
- هل الفنانة ليلي عز العرب شايفة انها حققت كل اللي عاوزاه في الدراما ولا في شخصيات كتيرة حابه تحققها وتسمع مع الجمهور أكتر ؟
- لا اعتقد ان في فنان مهما كان بيشتغل هيبقي حاسس انه عمل كل الادوار يعني مثلا انا معملتش لسه دور فلاحه او دور تاريخي او دور لغه عربية فصحي دا علي سبيل المثال .
- منذ ظهورك الأول وانتي دائما ما تبهرين المشاهدين باطلالتك ورشاقتك والشكل العام معظم الجمهور يقولوا انه شكلك فرنساوي او تركي وليس مصرية حدثينا عن السر وراء ذلك ؟
- انا بازعل اوي لما اسمع كدا وان شكلي موش مصري لاني مصرية جدا ومصرية حتي النخاع لكن السر ان كل جيلي غالبا جدوده خليط ما بين الأتراك و الصعايدة انما انا مصريه من الصميم .
- طبعا حضرتك قدامتي برامج كثيرة هل من وجهة نظرك التقديم البرامجي هو اضافة للممثل ؟
- انا بحب فعلا البرامج واعتقد انه استثمار لشهرة الممثل انه يوصل الكلمه الطيبه للناس .
- هل السوشيال ميديا بتتفاعلي معاها ؟
- لا للاسف انا غير متفاعله مع السوشيال ميديا و بعيده عنها للغاية .
- هل تري نجمتنا ان المنصات الاليكترونية كشاهد او واتش ات علي سبيل المثال قد تغني عن السينما والقنوات الفضائيه ؟
– المنصات الاليكترونيه اصبحت مهمه للغاية ولكنها ابداً لا تغني عن السينما ودور السينما و القنوات هي القنوات - في اخر الحوار تحبي حضرتك تنصحي و تقولي أيه للشباب والجيل الجديد ؟ والنجوم الصاعدة الجدد يبدا منين المسرح ولا الدراما ؟
- نصيحتي للجيل الجديد ان كل حاجه تعملها اعملها بضمير عشان تنجح اما النجوم الصاعده فمشاء الله هما عارفين طريقهم كويس .
في اخر حوارنا بنشكر نجمتنا الرائعه “ليلي عز العرب ” علي إسعاد جمهور بوابة إخباري بهذا اللقاء الممتع .
